ನವದೆಹಲಿ: ನಮ್ಮ ದೇಶದಲ್ಲಿ ಅನೇಕ ಪ್ರದೇಶಗಳು ನಿಂದನೀಯ ಭಾಷೆಯನ್ನು (Abusive Language) ಆಕ್ರಮಣಕಾರಿ ಎಂದು ಪರಿಗಣಿಸಿದರೂ, ಹಲವಾರು ರಾಜ್ಯಗಳಲ್ಲಿ ಜನರು ದೈನಂದಿನ ಸಂಭಾಷಣೆಗಳಲ್ಲಿ ಅದನ್ನು ಮುಕ್ತವಾಗಿ ಬಳಸುತ್ತಾರೆ. ಈ ಸಂಬಂಧ ಇದೀಗ ಸಮೀಕ್ಷೆಯೊಂದು (Survey) ನಡೆದಿದ್ದು, ಅದರಲ್ಲಿ ಇಡೀ ದೇಶದಲ್ಲಿಯೇ ಅತೀ ಹೆಚ್ಚು ನಿಂದನೆಯ ಪದ ಬಳಸುವ ರಾಜ್ಯ ಯಾವುದೆಂದು ಬಯಲಾಗಿದೆ.
ಹೌದು.. ಪ್ರೊಫೆಸರ್ ಡಾ. ಸುನಿಲ್ ಜಗ್ಲಾನ್ ಅವರು 2014 ರಿಂದ 2025 ರವರೆಗೆ ತಮ್ಮ ಸೆಲ್ಫಿ ವಿತ್ ಡಾಟರ್ ಫೌಂಡೇಶನ್ ಮತ್ತು ಮಹರ್ಷಿ ದಯಾನಂದ ವಿಶ್ವವಿದ್ಯಾಲಯದ ಅಡಿಯಲ್ಲಿ “ಗಾಲಿ ಬಂದ್ ಘರ್ ಅಭಿಯಾನ್” (ಮನೆಯಿಂದ ನಿಂದನೆ ರಹಿತ ಅಭಿಯಾನ)ವನ್ನು ಪ್ರಾರಂಭಿಸಿದರು. ಈ ಅಭಿಯಾನವು ಮನೆಯಲ್ಲಿ ಮತ್ತು ದೈನಂದಿನ ಜೀವನದಲ್ಲಿ ನಿಂದನೀಯ ಭಾಷೆಯ ಬಳಕೆಯನ್ನು ಅಧ್ಯಯನ ಮಾಡಲು ಯುವಕರು, ಶಿಕ್ಷಕರು, ವೈದ್ಯರು, ಆಟೋ ಚಾಲಕರು, ವಿದ್ಯಾರ್ಥಿಗಳು, ಪೊಲೀಸರು ಸೇರಿದಂತೆ ನಗರ ಮತ್ತು ಗ್ರಾಮೀಣ ಭಾರತದಾದ್ಯಂತ ಸುಮಾರು 70,000 ಜನರಿಂದ ಡೇಟಾವನ್ನು ಸಂಗ್ರಹಿಸಿತು.
ಇದನ್ನೂ ಓದಿ: ಯುವಜನರಲ್ಲಿ, ವಿಶೇಷವಾಗಿ ಮಹಿಳೆಯರಲ್ಲಿ ನಿರುದ್ಯೋಗ ದರ ಹೆಚ್ಚಳ- ಸಮೀಕ್ಷೆ ವರದಿ
ಸಮೀಕ್ಷೆಯ ಪ್ರಕಾರ, ಭಾರತದ ರಾಜಧಾನಿ ದೆಹಲಿ, ಅತಿ ಹೆಚ್ಚು ನಿಂದನೀಯ ಭಾಷೆಯನ್ನು ಬಳಸುವ ಜನರ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ದೆಹಲಿಯಲ್ಲಿ 80% ರಷ್ಟು ಜನರು ಅವಾಚ್ಯ ಶಬ್ದಗಳನ್ನು ಬಳಸುತ್ತಿದ್ದಾರೆ ಎಂದು ವರದಿಯಾಗಿದೆ. ದೆಹಲಿಯ ಜೀವನವು ವೇಗವಾಗಿದೆ ಮತ್ತು ಹೆಚ್ಚು ಒತ್ತಡದಿಂದ ಕೂಡಿದೆ. ಸಂಚಾರ, ಜನಸಂಖ್ಯಾ ಒತ್ತಡ ಮತ್ತು ದೈನಂದಿನ ಸ್ಪರ್ಧೆಯು ಜನರು ತಮ್ಮ ಹತಾಶೆಯನ್ನು ಕಠಿಣ ಅಥವಾ ಅವಾಚ್ಯ ಪದಗಳ ಮೂಲಕ ಹೊರಹಾಕಲು ಕಾರಣವಾಗುತ್ತದೆ. ಇನ್ನುಈಶಾನ್ಯವು 20 ರಿಂದ 30% ರಷ್ಟಿದ್ದರೆ, ಕಾಶ್ಮೀರವು ಅತ್ಯಂತ ಕಡಿಮೆ ಬಳಕೆಯನ್ನು (15%) ಹೊಂದಿದೆ.
ಪಂಜಾಬ್ ಎರಡನೇ ಸ್ಥಾನದಲ್ಲಿದ್ದು, 78% ರಷ್ಟು ಮಂದಿ ನಿಂದನಾತ್ಮಕ ಭಾಷೆ ಬಳಸಿರುವುದಾಗಿ ಒಪ್ಪಿಕೊಂಡಿದ್ದಾರೆ. ಪಂಜಾಬಿಗಳು ತಮ್ಮ ದಿಟ್ಟ ಮತ್ತು ಅಭಿವ್ಯಕ್ತಿಶೀಲ ಸ್ವಭಾವಕ್ಕೆ ಹೆಸರುವಾಸಿಯಾಗಿದ್ದಾರೆ. ಇಲ್ಲಿ ನಿಂದನೆಯನ್ನು ಹೆಚ್ಚಾಗಿ ಹಾಸ್ಯಮಯ ಅಥವಾ ಸ್ನೇಹಪರ ರೀತಿಯಲ್ಲಿ ಬಳಸಲಾಗುತ್ತದೆ. ಇದು ಕೆಲವೊಮ್ಮೆ ಸಾಂದರ್ಭಿಕ ಸಂಭಾಷಣೆಯ ಭಾಗವಾಗಿದೆ, ವಿಶೇಷವಾಗಿ ಆಪ್ತ ಸ್ನೇಹಿತರ ನಡುವೆ, ಹೊರಗಿನವರಿಗೆ ಇದು ಅಸಭ್ಯವಾಗಿ ಕಾಣಿಸಬಹುದು.
ಉತ್ತರ ಪ್ರದೇಶದಲ್ಲಿ 74% ರಷ್ಟು ಮಂದಿ ನಿಂದನೆಯ ಪದ ಬಳಸುತ್ತಾರೆ. ಇಲ್ಲಿಯ ಜನ ತಮ್ಮ ದೈನಂದಿನ ಸಂಭಾಷಣೆಗಳು, ರಾಜಕೀಯ ರ್ಯಾಲಿಗಳು ಮತ್ತು ಸ್ಥಳೀಯ ವಿವಾದಗಳಲ್ಲಿ ನಿಂದನೀಯ ಭಾಷೆಯ ಬಳಕೆ ಹೆಚ್ಚಾಗಿ ಕೇಳಿಬರುತ್ತದೆ. ಬಿಹಾರದಲ್ಲಿಯೂ 74% ನೊಂದಿಗೆ ನಂತರದ ಸ್ಥಾನದಲ್ಲಿವೆ. ಬಿಹಾರದ ಜನರು ಸಾಮಾನ್ಯವಾಗಿ ನೇರವಾಗಿ ಮಾತನಾಡುತ್ತಾರೆ. ಗ್ರಾಮೀಣ ಮತ್ತು ಅರೆ ನಗರ ಪ್ರದೇಶಗಳಲ್ಲಿ, ಭಿನ್ನಾಭಿಪ್ರಾಯಗಳ ಸಮಯದಲ್ಲಿ ಕೋಪವನ್ನು ವ್ಯಕ್ತಪಡಿಸಲು ಕೆಲವೊಮ್ಮೆ ನಿಂದನೆಗಳನ್ನು ಬಳಸಲಾಗುತ್ತದೆ.
ಇನ್ನುಳಿದಂತೆ ರಾಜಸ್ಥಾನ- 68%, ಹರ್ಯಾಣ- 62% , ಮಹಾರಾಷ್ಟ್ರ- 58%, ಗುಜರಾತ್ – 55%, ಮಧ್ಯಪ್ರದೇಶ – 48%, ಉತ್ತರಾಖಂಡ – 45%, ಕಾಶ್ಮೀರ – 15% ರಷ್ಟು ಮಂದಿ ನಿಂದನಾತ್ಮಕ ಭಾಷೆಯ ಬಳಕೆಯನ್ನು ವರದಿ ಮಾಡಿದ್ದಾರೆ.