ಇಂದಿನ ದಿನಗಳಲ್ಲಿ ಸ್ಮಾರ್ಟ್ಫೋನ್ (Smartphone) ಇಲ್ಲದ ಜೀವನವನ್ನು ಊಹಿಸಿಕೊಳ್ಳುವುದೂ (Tech Tips) ಕಷ್ಟ. ಬ್ಯಾಂಕಿಂಗ್, ಕಚೇರಿ ಕೆಲಸ, ಆನ್ಲೈನ್ ತರಗತಿಗಳು ಸೇರಿದಂತೆ ಪ್ರತಿಯೊಂದಕ್ಕೂ ನಾವು ಮೊಬೈಲ್ ಅನ್ನೇ ಅವಲಂಬಿಸಿದ್ದೇವೆ. ಹಾಗಾಗಿಯೇ ಹೊಸ ಫೋನ್ ಕೊಂಡಾಗ ಅದು ದೀರ್ಘಕಾಲ ಬಾಳಿಕೆ ಬರಬೇಕು ಎಂಬುದು ಎಲ್ಲರ ಹಂಬಲವಾಗಿರುತ್ತದೆ.
ಆದರೆ ಒಂದು ಸ್ಮಾರ್ಟ್ಫೋನ್ ಅನ್ನು ಎಷ್ಟು ವರ್ಷಗಳ ಕಾಲ ಬಳಸಬಹುದು ಮತ್ತು ಯಾವ ಸಮಯದಲ್ಲಿ ಹಳೆಯ ಫೋನ್ ಬದಲಾಯಿಸುವುದು ಸೂಕ್ತ ಎಂಬ ಗೊಂದಲ ಹೆಚ್ಚಿನವರಲ್ಲಿದೆ. ಇದಕ್ಕೆ ಪೂರಕವಾದ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಸಾಫ್ಟ್ವೇರ್ ಅಪ್ಡೇಟ್ ಮತ್ತು ಆಯುಷ್ಯ
ಸಾಮಾನ್ಯವಾಗಿ ಒಂದು ಉತ್ತಮ ಗುಣಮಟ್ಟದ ಸ್ಮಾರ್ಟ್ಫೋನ್ ಅನ್ನು ಕನಿಷ್ಠ 4 ರಿಂದ 6 ವರ್ಷಗಳವರೆಗೆ ಯಾವುದೇ ಪ್ರಮುಖ ಅಡೆತಡೆಗಳಿಲ್ಲದೆ ಸುಲಭವಾಗಿ ಬಳಸಬಹುದು. ಪ್ರೀಮಿಯಂ ಮಾದರಿಯ ಮೊಬೈಲ್ಗಳಿಗೆ ಕಂಪನಿಗಳು ದೀರ್ಘಾವಧಿಯ ಸಾಫ್ಟ್ವೇರ್ ಮತ್ತು ಭದ್ರತಾ ಅಪ್ಡೇಟ್ಗಳನ್ನು ನೀಡುವುದರಿಂದ ಅವುಗಳ ಕಾರ್ಯಕ್ಷಮತೆ ದೀರ್ಘಕಾಲದವರೆಗೆ ಅತ್ಯುತ್ತಮವಾಗಿರುತ್ತದೆ.
ಸದ್ಯದ ದಿನಗಳಲ್ಲಿ ಬಜೆಟ್ ಹಾಗೂ ಮಧ್ಯಮ ಶ್ರೇಣಿಯ ಫೋನ್ಗಳಿಗೂ ಸಹ ಕಂಪನಿಗಳು ಹೆಚ್ಚಿನ ವರ್ಷಗಳ ಸಾಫ್ಟ್ವೇರ್ ಅಪ್ಡೇಟ್ಗಳನ್ನು ಒದಗಿಸುತ್ತಿರುವುದು ಗ್ರಾಹಕರಿಗೆ ಸಹಕಾರಿಯಾಗಿದೆ.
ಬಳಕೆ ವಿಧಾನ ಮತ್ತು ಬ್ಯಾಟರಿ ಕಾಳಜಿ
ಯಾವುದೇ ಒಂದು ಮೊಬೈಲ್ ಎಷ್ಟು ವರ್ಷ ಬಾಳಿಕೆ ಬರುತ್ತದೆ ಎನ್ನುವುದು ಕೇವಲ ಅದರ ಬೆಲೆಯನ್ನು ಮಾತ್ರ ಅವಲಂಬಿಸಿರುವುದಿಲ್ಲ. ನಾವು ಅದನ್ನು ಬಳಸುವ ರೀತಿಯೂ ಮುಖ್ಯವಾಗಿರುತ್ತದೆ. ಅತಿಯಾಗಿ ಗೇಮಿಂಗ್ ಆಡುವುದು, ಫೋನ್ನಲ್ಲಿ ಇಂಟರ್ನಲ್ ಮೆಮೊರಿಯನ್ನು ಪೂರ್ತಿಯಾಗಿ ತುಂಬಿಸಿಡುವುದು, ನೂರಾರು ಅನಗತ್ಯ ಆಪ್ಗಳನ್ನು ಇನ್ಸ್ಟಾಲ್ ಮಾಡಿಕೊಳ್ಳುವುದು ಹಾಗೂ ಫೋನ್ ಕಾಯುವ ವಾತಾವರಣದಲ್ಲಿ ಹೆಚ್ಚು ಕಾಲ ಬಳಸುವುದು ಮೊಬೈಲ್ ಆಯುಷ್ಯವನ್ನು ಕುಂಠಿತಗೊಳಿಸುತ್ತದೆ.
ಇನ್ನು ಫೋನ್ನ ದೀರ್ಘಾಯುಷ್ಯಕ್ಕೆ ಬ್ಯಾಟರಿ ಅತ್ಯಂತ ಮುಖ್ಯವಾಗಿದ್ದು, ಸಾಮಾನ್ಯವಾಗಿ 2 ರಿಂದ 3 ವರ್ಷಗಳ ಬಳಕೆಯ ನಂತರ ಬ್ಯಾಟರಿ ಸಾಮರ್ಥ್ಯ ಕುಸಿಯಲಾರಂಭಿಸುತ್ತದೆ. ಚಾರ್ಜ್ ಬೇಗನೆ ಖಾಲಿಯಾಗುವುದು ಅಥವಾ ಫೋನ್ ಅತಿಯಾಗಿ ಬಿಸಿಯಾಗುವುದು ಕಂಡುಬಂದರೆ ಕೇವಲ ಬ್ಯಾಟರಿ ಬದಲಾಯಿಸುವ ಮೂಲಕ ಫೋನ್ನ ಆಯುಷ್ಯವನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳಬಹುದು.
ಹೊಸ ಫೋನ್ ಖರೀದಿಗೆ ಸೂಕ್ತ ಸಮಯ ಯಾವಾಗ?
ಕಂಪನಿಯು ಸಾಫ್ಟ್ವೇರ್ ಮತ್ತು ಭದ್ರತಾ ಅಪ್ಡೇಟ್ಗಳನ್ನು ನೀಡುವುದನ್ನು ನಿಲ್ಲಿಸಿದಾಗ ಹೊಸ ಫೋನ್ ಖರೀದಿಸುವ ಬಗ್ಗೆ ಯೋಚಿಸುವುದು ಜಾಣತನ. ಏಕೆಂದರೆ ಹೊಸ ಭದ್ರತಾ ಅಪ್ಡೇಟ್ಗಳು ಸಿಗದಿದ್ದರೆ ಹ್ಯಾಕಿಂಗ್ ಅಪಾಯಗಳು ಹೆಚ್ಚಾಗುತ್ತವೆ ಮತ್ತು ಇತ್ತೀಚಿನ ಆಪ್ಗಳು ಹಳೆಯ ಸಾಫ್ಟ್ವೇರ್ನಲ್ಲಿ ಸರಿಯಾಗಿ ರನ್ ಆಗುವುದಿಲ್ಲ.
ನಿಮ್ಮ ಫೋನ್ ಸದಾ ಹ್ಯಾಂಗ್ ಆಗುತ್ತಿದ್ದರೆ, ಬ್ಯಾಟರಿ ತಕ್ಷಣವೇ ಇಳಿಯುತ್ತಿದ್ದರೆ ಹಾಗೂ ರಿಪೇರಿ ವೆಚ್ಚವು ಅತಿ ಹೆಚ್ಚಾಗಿದ್ದರೆ ಮಾತ್ರ ಹೊಸ ಫೋನ್ಗೆ ಅಪ್ಗ್ರೇಡ್ ಆಗುವುದು ಒಳ್ಳೆಯದು. ಕೇವಲ ಮಾರುಕಟ್ಟೆಗೆ ಹೊಸ ಮಾಡೆಲ್ ಬಂದಿದೆ ಎಂಬ ಕಾರಣಕ್ಕೆ ಚೆನ್ನಾಗಿ ಕೆಲಸ ಮಾಡುತ್ತಿರುವ ಮೊಬೈಲ್ ಅನ್ನು ಬದಲಾಯಿಸುವ ಅಗತ್ಯವಿಲ್ಲ.
ನಿಯಮಿತ ಸಾಫ್ಟ್ವೇರ್ ಅಪ್ಡೇಟ್ಗಳು, ಸರಿಯಾದ ಚಾರ್ಜಿಂಗ್ ಅಭ್ಯಾಸಗಳು ಹಾಗೂ ಅಗತ್ಯಕ್ಕೆ ತಕ್ಕಂತೆ ಜಾಗರೂಕತೆಯಿಂದ ಬಳಸುವುದರಿಂದ ನಿಮ್ಮ ಸ್ಮಾರ್ಟ್ಫೋನ್ ಅನ್ನು ಹಲವು ವರ್ಷಗಳವರೆಗೆ ಆರಾಮವಾಗಿ ಬಳಸಬಹುದು. ಇದು ನಿಮ್ಮ ಹಣವನ್ನು ಉಳಿಸುವುದಲ್ಲದೆ ಅತ್ಯುತ್ತಮ ಡಿಜಿಟಲ್ ಅನುಭವವನ್ನೂ ನೀಡುತ್ತದೆ.