ಅಬುಧಾಬಿ: ಅಮೆರಿಕ ಮತ್ತು ಇರಾನ್(America-Iran) ನಡುವಿನ ಉಲ್ಬಣಗೊಳ್ಳುತ್ತಿರುವ ಸಂಘರ್ಷದ ಬೆನ್ನಲ್ಲೇ, ಮಧ್ಯಪ್ರಾಚ್ಯದಲ್ಲಿ ಮತ್ತೊಂದು ಆತಂಕಕಾರಿ ಘಟನೆ ನಡೆದಿದೆ. ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ರಾಜಧಾನಿ ಅಬುಧಾಬಿಯ ಅಲ್ ದಫ್ರಾ ಪ್ರದೇಶದಲ್ಲಿರುವ ಬರಾಕಾ ಪರಮಾಣು ವಿದ್ಯುತ್ ಸ್ಥಾವರದ (Barakah Nuclear Power Plant) ಆವರಣದ ಹೊರಭಾಗದಲ್ಲಿ ಭಾನುವಾರ ಡ್ರೋನ್ (Drone) ದಾಳಿಯ ಬೆನ್ನಲ್ಲೇ ಭಾರಿ ಅಗ್ನಿ ಅವಘಡ ಸಂಭವಿಸಿದೆ ಎಂದು ಸ್ಥಳೀಯ ಅಧಿಕಾರಿಗಳು ತಿಳಿಸಿದ್ದಾರೆ.
ವಿಕಿರಣ ಸುರಕ್ಷತೆ ಸಂಪೂರ್ಣ ಸುಭದ್ರ
ಸ್ಥಾವರದ ರಕ್ಷಣಾತ್ಮಕ ಗಡಿಯ ಹೊರಭಾಗದಲ್ಲಿ ಈ ಬೆಂಕಿ ಕಾಣಿಸಿಕೊಂಡಿದ್ದು, ಘಟನೆಯಲ್ಲಿ ಯಾವುದೇ ಪ್ರಾಣಹಾನಿ ಅಥವಾ ಗಾಯಗಳಾದ ಬಗ್ಗೆ ವರದಿಯಾಗಿಲ್ಲ. ಫೆಡರಲ್ ಅಥಾರಿಟಿ ಫಾರ್ ನ್ಯೂಕ್ಲಿಯರ್ ರೆಗ್ಯುಲೇಶನ್ ಸಂಸ್ಥೆಯು ಈ ಬೆಂಕಿಯಿಂದಾಗಿ ಸ್ಥಾವರದ ಸುರಕ್ಷತೆಗಾಗಲಿ ಅಥವಾ ಅದರ ಪ್ರಮುಖ ವ್ಯವಸ್ಥೆಗಳ ಕಾರ್ಯಕ್ಷಮತೆಗಾಗಲಿ ಯಾವುದೇ ತೊಂದರೆಯಾಗಿಲ್ಲ ಎಂಬುದನ್ನು ಸ್ಪಷ್ಟಪಡಿಸಿದೆ. ಸ್ಥಾವರದ ಎಲ್ಲಾ ಘಟಕಗಳು ಎಂದಿನಂತೆ ಕಾರ್ಯನಿರ್ವಹಿಸುತ್ತಿವೆ ಎಂದು ಅಬುಧಾಬಿ ಮಾಧ್ಯಮ ಕಚೇರಿ ತನ್ನ ಅಧಿಕೃತ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಪ್ರಕಟಿಸಿದೆ. ಅಲ್ಲದೆ, ಸಾರ್ವಜನಿಕರು ವದಂತಿಗಳನ್ನು ನಂಬಬಾರದು ಮತ್ತು ಅಧಿಕೃತ ಮೂಲಗಳಿಂದ ಮಾತ್ರ ಮಾಹಿತಿ ಪಡೆಯಬೇಕು ಎಂದು ವಿನಂತಿಸಿದೆ.
ಯುಎಇ ವಿದ್ಯುತ್ ಶಕ್ತಿಯ ಪ್ರಮುಖ ಆಧಾರ
ಸೌದಿ ಅರೇಬಿಯಾ ಮತ್ತು ಕತಾರ್ ದೇಶಗಳ ಗಡಿಯ ಸಮೀಪವಿರುವ ಬರಾಕಾ ಪರಮಾಣು ವಿದ್ಯುತ್ ಸ್ಥಾವರವು 2020 ರಲ್ಲಿ ತನ್ನ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತು. ಎಎಫ್ಪಿ (AFP) ಸುದ್ದಿ ಸಂಸ್ಥೆಯ ಪ್ರಕಾರ, ಈ ಸ್ಥಾವರವು ಇಡೀ ಯುಎಇ ದೇಶದ ಒಟ್ಟು ವಿದ್ಯುತ್ ಅಗತ್ಯತೆಯ ಸುಮಾರು ಕಾಲು ಭಾಗವನ್ನು (ನಾಲ್ಕನೇ ಒಂದು ಭಾಗ) ಪೂರೈಸುವ ಅತ್ಯಂತ ನಿರ್ಣಾಯಕ ಮೂಲಸೌಕರ್ಯವಾಗಿದೆ.
ಇರಾನ್ ವಿರುದ್ಧ ಅನುಮಾನದ ಮುಳ್ಳು
ಈ ದಾಳಿಯ ಹೊಣೆಯನ್ನು ಯುಎಇ ನೇರವಾಗಿ ಯಾರ ಮೇಲೂ ಹೊರಿಸದಿದ್ದರೂ, ಇದರ ಹಿಂದೆ ಇರಾನ್ ಕೈವಾಡವಿರುವ ಶಂಕೆ ವ್ಯಕ್ತವಾಗಿದೆ. ಕಳೆದ ಫೆಬ್ರವರಿ 28 ರಿಂದ ಗಲ್ಫ್ ಪ್ರದೇಶದಲ್ಲಿ ಯುದ್ಧದ ವಾತಾವರಣ ನಿರ್ಮಾಣವಾದಾಗಿನಿಂದ, ಯುಎಇ ತನ್ನ ಇಂಧನ ಮತ್ತು ಆರ್ಥಿಕ ಮೂಲಸೌಕರ್ಯಗಳ ಮೇಲಿನ ಸರಣಿ ಡ್ರೋನ್ ದಾಳಿಗಳಿಗೆ ಇರಾನ್ ದೇಶವನ್ನೇ ನಿರಂತರವಾಗಿ ಹೊಣೆಮಾಡುತ್ತಾ ಬಂದಿದೆ.
ಇನ್ನೊಂದೆಡೆ, ತನ್ನ ಮೂಲಸೌಕರ್ಯಗಳ ಮೇಲಿನ ದಾಳಿಗೆ ಪ್ರತಿಯಾಗಿ ಯುಎಇ ಇರಾನ್ ಮೇಲೆ ರಹಸ್ಯವಾಗಿ ದಾಳಿ ನಡೆಸಿದೆ ಎಂದು ವರದಿ ಹೊರ ಬಿದ್ದಿತ್ತು. ಈ ವರದಿಯನ್ನು ನೇರವಾಗಿ ಉಲ್ಲೇಖಿಸದ ಯುಎಇ ವಿದೇಶಾಂಗ ಸಚಿವಾಲಯವು, ಇತ್ತೀಚೆಗೆ ನಾವು ಕೈಗೊಂಡಿರುವ ಎಲ್ಲಾ ಕ್ರಮಗಳು ನಮ್ಮ ದೇಶದ ಪ್ರಮುಖ ಮೂಲಸೌಕರ್ಯಗಳು ಮತ್ತು ಜನರನ್ನು ರಕ್ಷಿಸಲು ಅಗತ್ಯವಿರುವ ರಕ್ಷಣಾತ್ಮಕ ಕ್ರಮಗಳಾಗಿವೆ ಎಂದು ಸ್ಪಷ್ಟಪಡಿಸಿದೆ. ಪ್ರಸ್ತುತ ಅಮೆರಿಕ ಮತ್ತು ಇರಾನ್ ನಡುವಿನ ರಾಜತಾಂತ್ರಿಕ ಮಾತುಕತೆಗಳು ವಿಫಲವಾಗಿದ್ದು, ಇರಾನ್ ತನ್ನ ಪರಮಾಣು ಕಾರ್ಯಕ್ರಮ ಕೇವಲ ನಾಗರಿಕ ಬಳಕೆಗೆ ಮಾತ್ರ ಎಂದು ಹೇಳುತ್ತಿದ್ದರೂ ಪ್ರಕ್ಷುಬ್ಧ ವಾತಾವರಣ ಮುಂದುವರಿದಿದೆ.
ಇದನ್ನೂ ಓದಿ: ಮುಗಿಯದ ಕೊಲ್ಲಿ ಸಂಘರ್ಷ, ಟ್ರಂಪ್ ವಿರುದ್ಧ ಗುಡುಗಿದ ಇರಾನ್!