ಬೆಂಗಳೂರು: ಮಲ್ಟಿಪ್ಲೆಕ್ಸ್ ಸಿನಿಮಾ ಮಂದಿರಗಳು ಪ್ರೇಕ್ಷಕರಿಗೆ ಅತಿಹೆಚ್ಚು ಟಿಕೆಟ್ ರೇಟ್ ವಿಧಿಸುವುದು ಅಲ್ಲದೆ ಸಿನಿಮಾ ಶುರುವಾಗುವ ಮೊದಲು ಸಿಕ್ಕಾಪಟ್ಟೆ ಜಾಹೀರಾತು ಹಾಕುವ ಆರೋಪ ಇದ್ದೇ ಇದೆ. ಇದೇ ರೀತಿ ಮಾಡುತ್ತಿದ್ದ ಪಿವಿಆರ್, ಐನಾಕ್ಸ್‌ಗೆ ಈಗ ಸರಿಯಾದ ಪಾಠ ಕಲಿಸಿದೆ ಕೋರ್ಟ್. ಈ ಮೂಲಕ 28,000 ರೂಪಾಯಿ ದಂಡವನ್ನೂ ಪ್ರಯೋಗ ಮಾಡಿದೆ.
2023ರಲ್ಲಿ ಬೆಂಗಳೂರಿನ ಅಭಿಷೇಕ್ ಎಂಬುವವರು ಶ್ಯಾಮ್ ಬಹಾದ್ದೂರ್ ಸಿನಿಮಾ ವೀಕ್ಷಣೆಗೆ ಪಿವಿಆರ್‌ಗೆ ಹೋಗಿದ್ದರು. ತಮ್ಮ ಬ್ಯುಸಿ ಷೆಡ್ಯೂಲ್ ಮಧ್ಯೆಯೂ ಅಭಿಷೇಕ್ ಸಿನಿಮಾ ಹೋಗಿ ಒಂದಷ್ಟು ರಿಲ್ಯಾಕ್ಸ್ ಆಗುವ ಪ್ಲಾನ್ ಇಟ್ಟುಕೊಂಡಿದ್ದರು. ಆದರೆ ಸಿನಿಮಾ ಆರಂಭಕ್ಕೂ ಮುನ್ನ 25 ರಿಂದ 30 ನಿಮಿಷಗಳ ಜಾಹೀರಾತು ಪ್ರಸಾರ ಮಾಡಲಾಗಿತ್ತು. ಇದನ್ನು ಕಂಡು ಪ್ರೇಕ್ಷಕ ಅಭಿಷೇಕ್ ಥಿಯೇಟರ್ ಆಡಳಿತದ ಬಗ್ಗೆ ಕೋಪಗೊಂಡಿದ್ದರು.
ಪಿವಿಆರ್ & ಐನಾಕ್ಸ್‌ಗೆ ತೀವ್ರ ಆಘಾತ
ಎಷ್ಟು ನಿಮಿಷ ಜಾಹೀರಾತು ಪ್ರಸಾರ ಮಾಡುತ್ತೇವೆ? ಎಂಬುದನ್ನು ತಿಳಿಸಿರಲಿಲ್ಲ. ಇದರಿಂದ ಮಾನಸಿಕ ಹಿಂಸೆ ಆಗಿದೆ ಎಂದು, ಈ ಜಾಹೀರಾತು ಪ್ರಸಾರದ ವಿರುದ್ಧ ಗ್ರಾಹಕ ವ್ಯವಹಾರಗಳ ಕೋರ್ಟ್‌ಗೆ ಅರ್ಜಿ ಕೂಡ ಸಲ್ಲಿಸಿದ್ದರು ಅಭಿಷೇಕ್. ಬೆಂಗಳೂರು ಮೂಲದ ವ್ಯಕ್ತಿ ಸಲ್ಲಿಸಿರುವ ಅರ್ಜಿಯ ತೀರ್ಪು ಪ್ರಕಟವಾಗಿದ್ದು, ಪಿವಿಆರ್ & ಐನಾಕ್ಸ್‌ಗೆ ಆಘಾತವೇ ಎದುರಾಗಿದೆ.
28 ಸಾವಿರ ರೂಪಾಯಿ ದಂಡ
ಕೋರ್ಟ್ ನೀಡಿರುವ ತೀರ್ಪಿನ ಪ್ರಕಾರ, ಪ್ರೇಕ್ಷಕನಿಗೆ 20 ಸಾವಿರ ರೂಪಾಯಿ ಪರಿಹಾರವನ್ನು ನೀಡಲು ಸೂಚಿಸಲಾಗಿದೆ. ಪಿವಿಆರ್ ಸಿನಿಮಾ, ಐನಾಕ್ಸ್‌ಗೆ ಈ ಬಗ್ಗೆ ಇದೀಗ ಕೋರ್ಟ್ ಸೂಚನೆ ನೀಡಿದೆ. ಕೋರ್ಟ್ ವೆಚ್ಚವಾಗಿ 8 ಸಾವಿರ ರೂಪಾಯಿ ಹಣವನ್ನೂ ನೀಡಬೇಕಿದೆ. ಈ ಮೂಲಕ ಇನ್ನುಮುಂದೆ ಸಿನಿಮಾ ಆರಂಭಕ್ಕೂ ಮೊದಲು ಜಾಹೀರಾತು ಹಾಕುವ ಕುರಿತು ಮಲ್ಟಿಪ್ಲೆಕ್ಸ್ ಸಂಸ್ಥೆಗಳು ಚಿಂತಿಸಬೇಕಿದೆ, ಅಂತಾ ಸಲಹೆ ನೀಡುತ್ತಿದ್ದಾರೆ ಜನ.