ನಾವು ದಿನನಿತ್ಯ ಬಳಸುವ ಅನೇಕ ಔಷಧಿ ಮಾತ್ರೆಗಳ (Tablets) ಮಧ್ಯದಲ್ಲಿ ಒಂದು ಸಣ್ಣ ಗೆರೆ ಇರುವುದನ್ನು (Interesting Facts) ನೀವು ಗಮನಿಸಿರಬಹುದು. ಇದನ್ನು ಹೆಚ್ಚಿನವರು ಕೇವಲ ಒಂದು ವಿನ್ಯಾಸ ಅಥವಾ ಗುರುತಿಗಾಗಿ ಮಾಡಿರಬಹುದು ಎಂದು ಭಾವಿಸುತ್ತಾರೆ.
ಆದರೆ, ವೈದ್ಯಕೀಯ ಲೋಕದಲ್ಲಿ ಈ ಪುಟ್ಟ ಗೆರೆಗೆ ತನ್ನದೇ ಆದ ವಿಶೇಷ ಪ್ರಾಮುಖ್ಯತೆ ಇದೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ ‘ಸ್ಕೋರ್ ಲೈನ್’ (Score Line) ಎಂದು ಕರೆಯಲಾಗುತ್ತದೆ. ಹಾಗಾದರೆ ಈ ಗೆರೆ ಏಕಿದೆ ಮತ್ತು ಇದರ ಹಿಂದಿರುವ ವೈಜ್ಞಾನಿಕ ಕಾರಣವೇನು ಎಂಬ ಮಾಹಿತಿ ಇಲ್ಲಿದೆ.
ನಿಖರವಾದ ಡೋಸೇಜ್ ಪಡೆಯಲು ಸಹಕಾರಿ
ನವದೆಹಲಿಯ ಸರ್ ಗಂಗಾರಾಮ್ ಆಸ್ಪತ್ರೆಯ ತಜ್ಞರಾದ ಡಾ. ಸೋನಿಯಾ ರಾವತ್ ಅವರ ಪ್ರಕಾರ, ಮಾತ್ರೆಗಳ ಮೇಲೆ ಇರುವ ಈ ‘ಸ್ಕೋರ್ ಲೈನ್’ ಮುಖ್ಯವಾಗಿ ಆ ಮಾತ್ರೆಯನ್ನು ಎರಡು ಸಮಾನ ಭಾಗಗಳಾಗಿ ವಿಭಜಿಸಲು ಸಹಾಯ ಮಾಡುತ್ತದೆ.
ಉದಾಹರಣೆಗೆ, ಒಂದು ಮಾತ್ರೆ 500 ಎಂಜಿ (500mg) ಶಕ್ತಿಯನ್ನು ಹೊಂದಿದ್ದು, ವೈದ್ಯರು ನಿಮಗೆ ಕೇವಲ 250 ಎಂಜಿ ಮಾತ್ರ ತೆಗೆದುಕೊಳ್ಳಲು ಸೂಚಿಸಿದರೆ, ಈ ಗೆರೆಯ ಸಹಾಯದಿಂದ ಮಾತ್ರೆಯನ್ನು ಸುಲಭವಾಗಿ ಅರ್ಧಕ್ಕೆ ಮುರಿದು ನಿಖರ ಪ್ರಮಾಣದ ಔಷಧಿಯನ್ನು ಪಡೆಯಬಹುದು.
ಎಲ್ಲಾ ಮಾತ್ರೆಗಳನ್ನು ಮುರಿಯುವುದು ಅಪಾಯಕಾರಿ
ಇಲ್ಲಿ ನಾವು ಬಹಳ ಮುಖ್ಯವಾಗಿ ಗಮನಿಸಬೇಕಾದ ಅಂಶವೊಂದಿದೆ. ಎಲ್ಲಾ ಮಾತ್ರೆಗಳ ಮೇಲೂ ಈ ಗೆರೆ ಇರುವುದಿಲ್ಲ. ಯಾವ ಮಾತ್ರೆಗಳ ಮೇಲೆ ಗೆರೆ ಇರುವುದಿಲ್ಲವೋ, ಅಂತಹ ಮಾತ್ರೆಗಳನ್ನು ಎಂದಿಗೂ ಅರ್ಧ ಮಾಡಿ ಅಥವಾ ಪುಡಿ ಮಾಡಿ ಸೇವಿಸಬಾರದು.
ಇದಕ್ಕೆ ಕೆಲವು ಪ್ರಮುಖ ಕಾರಣಗಳಿವೆ. ಕೆಲವು ಮಾತ್ರೆಗಳನ್ನು ‘ಸಸ್ಟೈನ್ಡ್ ರಿಲೀಸ್’ (Sustained Release) ಮಾದರಿಯಲ್ಲಿ ವಿನ್ಯಾಸಗೊಳಿಸಲಾಗಿರುತ್ತದೆ. ಅಂದರೆ ಇವು ದೇಹವನ್ನು ಸೇರಿದ ನಂತರ ನಿಧಾನವಾಗಿ ಕರಗಿ ಔಷಧಿಯನ್ನು ಬಿಡುಗಡೆ ಮಾಡುತ್ತವೆ.
ಇಂತಹ ಮಾತ್ರೆಗಳನ್ನು ಮುರಿದು ಸೇವಿಸಿದರೆ, ಔಷಧಿಯು ಒಮ್ಮೆಯೇ ರಕ್ತಕ್ಕೆ ಸೇರಿ ಗಂಭೀರ ಅಡ್ಡಪರಿಣಾಮಗಳು ಉಂಟಾಗುವ ಅಪಾಯವಿರುತ್ತದೆ. ಹಾಗೆಯೇ ಕೆಲವು ಮಾತ್ರೆಗಳ ಮೇಲೆ ವಿಶೇಷವಾದ ಲೇಪನ (Coating) ಇರುತ್ತದೆ. ಇವುಗಳನ್ನು ಮುರಿದಾಗ ಒಳಗಿರುವ ಔಷಧವು ಗಾಳಿ ಅಥವಾ ಹೊಟ್ಟೆಯಲ್ಲಿನ ಆಮ್ಲದ ಪ್ರಭಾವಕ್ಕೆ ಒಳಗಾಗಿ ತನ್ನ ಶಕ್ತಿಯನ್ನು ಕಳೆದುಕೊಳ್ಳಬಹುದು.
ವೈದ್ಯಕೀಯ ತಜ್ಞರ ಪ್ರಕಾರ, ಸ್ಕೋರ್ ಲೈನ್ ಇರುವ ಮಾತ್ರೆಗಳನ್ನು ಮಾತ್ರ ಸರಿಸಮನಾಗಿ ವಿಭಜಿಸಿ ಬಳಸಬೇಕು. ಗೆರೆ ಇಲ್ಲದ ಮಾತ್ರೆಗಳನ್ನು ಬಲವಂತವಾಗಿ ಮುರಿದಾಗ ಅವು ಸಮಾನವಾಗಿ ಭಾಗವಾಗುವುದಿಲ್ಲ. ಇದರಿಂದ ದೇಹಕ್ಕೆ ಸೇರುವ ಔಷಧಿಯ ಪ್ರಮಾಣದಲ್ಲಿ ವ್ಯತ್ಯಾಸವಾಗಿ ಚಿಕಿತ್ಸೆಯ ಫಲಿತಾಂಶದ ಮೇಲೆ ಪರಿಣಾಮ ಬೀರಬಹುದು. ಆದ್ದರಿಂದ, ಯಾವುದೇ ಮಾತ್ರೆಯನ್ನು ಅರ್ಧ ಮಾಡುವ ಮೊದಲು ಅದರ ಮೇಲೆ ಗೆರೆ ಇದೆಯೇ ಎಂದು ಗಮನಿಸುವುದು ಮತ್ತು ವೈದ್ಯರ ಸಲಹೆ ಪಡೆಯುವುದು ಅತ್ಯಗತ್ಯ.