ನವದೆಹಲಿ : ಪಶ್ಚಿಮ ಏಷ್ಯಾದಲ್ಲಿ (Middle East) ನಡೆಯುತ್ತಿದ್ದ ಭೀಕರ ಸಂಘರ್ಷಕ್ಕೆ ಕೊನೆಗೂ ಕದನ ವಿರಾಮ ಘೋಷಣೆಯಾಗಿದ್ದು, ಭಾರತದ ಇಂಧನ ವಲಯ ನಿಟ್ಟುಸಿರು ಬಿಟ್ಟಿದೆ. ಯುದ್ಧದ ಹಿನ್ನೆಲೆಯಲ್ಲಿ ಹೋರ್ಮುಜ್ ಜಲಸಂಧಿ (Strait of Hormuz) ಮುಚ್ಚಲ್ಪಟ್ಟಿದ್ದರಿಂದ ಭಾರತದ ಎಲ್ಎನ್ಜಿ (Gas supply) ಗ್ಯಾಸ್ ಆಮದಿನ ಮೇಲೆ ಭಾರಿ ಹೊಡೆತ ಬಿದ್ದಿತ್ತು. ಈ ಕಾರಣಕ್ಕಾಗಿ ನೈಸರ್ಗಿಕ ಅನಿಲ ಪೂರೈಕೆಯನ್ನು ನಿಯಂತ್ರಿಸಲು ಕಳೆದ ಮಾರ್ಚ್ 2026 ರಲ್ಲಿ ಹೊರಡಿಸಲಾಗಿದ್ದ ತುರ್ತು ಆದೇಶವನ್ನು ಕೇಂದ್ರ ಸರ್ಕಾರ ಈಗ ಅಧಿಕೃತವಾಗಿ ಹಿಂಪಡೆದಿದೆ.
ಕದನ ವಿರಾಮದಿಂದ ಮುಕ್ತವಾದ ಹೋರ್ಮುಜ್ ಜಲಸಂಧಿ
ಮಧ್ಯಪ್ರಾಚ್ಯದಲ್ಲಿ ಸಂಘರ್ಷ ತೀವ್ರಗೊಂಡಿದ್ದಾಗ ಎಲ್ಎನ್ಜಿ ಹಡಗುಗಳ ಸಂಚಾರ ಸಂಪೂರ್ಣ ಸ್ಥಗಿತಗೊಂಡಿತ್ತು ಮತ್ತು ಪೂರೈಕೆದಾರರು ತುರ್ತು ಪರಿಸ್ಥಿತಿಯ ನಿಯಮಗಳನ್ನು ಜಾರಿಗೆ ತಂದಿದ್ದರು. ಆದರೆ ಈಗ ಕದನ ವಿರಾಮ ಘೋಷಣೆಯಾಗಿ ಸಂಧಾನ ಮಾತುಕತೆಗಳು ನಡೆಯುತ್ತಿರುವುದರಿಂದ, ಹೋರ್ಮುಜ್ ಜಲಸಂಧಿಯ ಮೂಲಕ ಎಲ್ಎನ್ಜಿ ಹಡಗುಗಳ ಸಂಚಾರಕ್ಕೆ ಮರುಅನುಮತಿ ನೀಡಲಾಗಿದೆ. ಹೀಗಾಗಿ ಇಂಧನ ಪೂರೈಕೆ ಸಹಜ ಸ್ಥಿತಿಗೆ ಮರಳುತ್ತಿದೆ.
ತುರ್ತು ಪರಿಸ್ಥಿತಿಯಲ್ಲಿ ದೇಶವನ್ನು ಕಾಯ್ದ ಗ್ಯಾಸ್ ಹಂಚಿಕೆ
ಯುದ್ಧದ ಸಮಯದಲ್ಲಿ ದೇಶದ ಪ್ರಮುಖ ವಲಯಗಳಿಗೆ ಗ್ಯಾಸ್ ಕೊರತೆಯಾಗದಂತೆ ತಡೆಯಲು ಸರ್ಕಾರ ‘ಅಗತ್ಯ ವಸ್ತುಗಳ ಕಾಯ್ದೆ’ಯಡಿ ತುರ್ತು ಅಧಿಕಾರವನ್ನು ಬಳಸಿತ್ತು. ದೇಶೀಯ ಪೈಪ್ಡ್ ನ್ಯಾಚುರಲ್ ಗ್ಯಾಸ್ (D-PNG) ಬಳಕೆದಾರರಿಗೆ ಮತ್ತು ಸಾರಿಗೆಗೆ ಬಳಸುವ ಸಿಎನ್ಜಿ (CNG) ವಾಹನಗಳಿಗೆ ಶೇ. 100 ರಷ್ಟು ಗ್ಯಾಸ್ ಪೂರೈಕೆಯನ್ನು ಸರ್ಕಾರ ಖಾತರಿಪಡಿಸಿತ್ತು. ಇದೇ ವೇಳೆ ರಸಗೊಬ್ಬರ ವಲಯಕ್ಕೆ ನೀಡಲಾಗುತ್ತಿದ್ದ ಗ್ಯಾಸ್ ಪ್ರಮಾಣವನ್ನು ಮೊದಲು ಶೇ. 70 ಕ್ಕೆ ಇಳಿಸಿ, ನಂತರ ಹಂತ ಹಂತವಾಗಿ ಶೇ. 95 ಕ್ಕೆ ಹೆಚ್ಚಿಸುವ ಮೂಲಕ ಆದ್ಯತೆಯ ವಲಯಗಳನ್ನು ಸರ್ಕಾರ ಸುರಕ್ಷಿತವಾಗಿ ಕಾಪಾಡಿತ್ತು.
ಎಲ್ಎನ್ಜಿಗಾಗಿ ವಿದೇಶಗಳ ಮೇಲೆಯೇ ಭಾರತ ಅವಲಂಬಿತ
ಗ್ಯಾಸ್ಟೆಕ್ನ ಇತ್ತೀಚಿನ ವರದಿಯ ಪ್ರಕಾರ, ಜಗತ್ತಿನಲ್ಲಿಯೇ ಎಲ್ಎನ್ಜಿ ಆಮದು ಮಾಡಿಕೊಳ್ಳುವ ದೇಶಗಳಲ್ಲಿ ಭಾರತ 4ನೇ ಸ್ಥಾನದಲ್ಲಿದೆ. ಭಾರತ ತನ್ನ ಒಟ್ಟು ಎಲ್ಎನ್ಜಿ ಬಳಕೆಯ ಶೇ. 41.4 ರಷ್ಟನ್ನು ಕತಾರ್ ದೇಶದಿಂದಲೇ ಪಡೆದುಕೊಳ್ಳುತ್ತದೆ. ಭಾರತವು ಕಳೆದ 2025ರ ಹಣಕಾಸು ವರ್ಷದಲ್ಲಿ ಒಟ್ಟು 27 ಮಿಲಿಯನ್ ಟನ್ ಎಲ್ಎನ್ಜಿ ಆಮದು ಮಾಡಿಕೊಂಡಿದ್ದು, ಅದರಲ್ಲಿ 11.2 ಮಿಲಿಯನ್ ಟನ್ಗಳಷ್ಟು ಗ್ಯಾಸ್ ಅನ್ನು ಕತಾರ್ನ ‘ರಾಸ್ ಲಫ್ಫಾನ್’ನಿಂದಲೇ ತರಿಸಿಕೊಳ್ಳಲಾಗಿತ್ತು. ಹೀಗಾಗಿಯೇ ಹೋರ್ಮುಜ್ ಜಲಸಂಧಿ ಬಂದ್ ಆದಾಗ ಭಾರತದ ಒಟ್ಟು ಬಳಕೆಯ ಅರ್ಧದಷ್ಟು ಗ್ಯಾಸ್ ಪೂರೈಕೆಗೆ ಕಂಟಕ ಎದುರಾಗಿತ್ತು.
ಇಂಧನ ದರ ಇಳಿಕೆಗೆ ಮತ್ತಷ್ಟು ಬಲ
ಕದನ ವಿರಾಮ ಘೋಷಣೆಯಾಗಿ ಹಡಗುಗಳ ಸಂಚಾರ ಆರಂಭವಾಗಿರುವುದರಿಂದ ದೇಶದಲ್ಲಿ ಇಂಧನ ಪೂರೈಕೆ ವ್ಯವಸ್ಥೆ ವೇಗವಾಗಿ ಸುಧಾರಿಸುತ್ತಿದೆ. ಇದರ ಪರಿಣಾಮವಾಗಿ, ಈಗಾಗಲೇ ಜೂನ್ 29 ರಿಂದ ಜಾರಿಗೆ ಬರುವಂತೆ ಸರ್ಕಾರವು ಡೀಸೆಲ್ ಮತ್ತು ಪೆಟ್ರೋಲ್ ಮಾರಾಟದ ಮೇಲಿದ್ದ ಮಿತಿಗಳನ್ನು ತೆಗೆದುಹಾಕಿದೆ. ಅಷ್ಟೇ ಅಲ್ಲದೆ ವಾಣಿಜ್ಯ ಬಳಕೆಯ ಎಲ್ಪಿಜಿ ಸಿಲಿಂಡರ್, ವಿಮಾನ ಇಂಧನ (ATF) ಮತ್ತು 5 ಕೆಜಿ ತೂಕದ ಸಣ್ಣ ಎಲ್ಪಿಜಿ ಸಿಲಿಂಡರ್ಗಳ ಬೆಲೆಯನ್ನು ಕೂಡ ಇಳಿಕೆ ಮಾಡಲಾಗಿದ್ದು, ಜನಸಾಮಾನ್ಯರಿಗೆ ದೊಡ್ಡ ಮಟ್ಟದ ನಿರಾಳತೆ ಸಿಕ್ಕಿದೆ
ಇದನ್ನೂ ಓದಿ : ನಮ್ಮಲ್ಲಿ ಬಾಸ್ ಯಾರು ಎಂದು ನೆತನ್ಯಾಹುಗೆ ಚೆನ್ನಾಗಿ ಗೊತ್ತು: ಟ್ರಂಪ್ ಟಾಂಗ್