ಬೆಂಗಳೂರು : ನಗರದ (Bengaluru) ಕೊತ್ತನೂರು ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಒಂದು ಅಚ್ಚರಿಯ ಘಟನೆ ನಡೆದಿದೆ. ಅಕ್ರಮ ಚಟುವಟಿಕೆಗಳಲ್ಲಿ ಭಾಗಿಯಾದ ಆರೋಪದ ಮೇಲೆ ನಿಗಾ ಕೇಂದ್ರದಲ್ಲಿ (Monitoring center) ಇರಿಸಲಾಗಿದ್ದ ನಾಲ್ವರು ವಿದೇಶಿ ಮಹಿಳೆಯರು (Foreign women) ಅತ್ಯಂತ ಚಾಣಾಕ್ಷತನದಿಂದ ಅಲ್ಲಿಂದ ತಪ್ಪಿಸಿಕೊಂಡಿದ್ದಾರೆ.
ಬೆಂಗಳೂರಿನ ಚಿಕ್ಕಗುಬ್ಬಿ ಎಂಬಲ್ಲಿರುವ ‘ಹೋಮ್ ಆಫ್ ಹೋಪ್’ ಎಂಬ ಆಶ್ರಮದಲ್ಲಿ ಈ ಘಟನೆ ಸಂಭವಿಸಿದೆ. ಉಗಾಂಡ ಮೂಲದ ಈ ಮಹಿಳೆಯರು ಮೇ 11ರ ಬೆಳಗಿನ ಜಾವ ಸುಮಾರು 3 ಗಂಟೆಯ ಹೊತ್ತಿಗೆ ಯಾರ ಗಮನಕ್ಕೂ ಬರದಂತೆ ಕಟ್ಟಡದ ಎರಡನೇ ಮಹಡಿಯ ಕಿಟಕಿಯ ಕಬ್ಬಿಣದ ಗ್ರಿಲ್ಗಳನ್ನು ಮುರಿದು ಪರಾರಿಯಾಗಿದ್ದಾರೆ. ಈ ನಾಲ್ವರು ಮಹಿಳೆಯರು ತೋಪಿಷ್ಟ, ನಗವ, ಸಫಿನಾ ಮತ್ತು ಪಿತೀನ ಮೂಲತಃ ಉಗಾಂಡ ಮತ್ತು ನೈಜೀರಿಯಾದವರಾಗಿದ್ದು, ಕಾನೂನು ಬಾಹಿರವಾಗಿ ನಗರದಲ್ಲಿ ವಾಸಿಸುತ್ತಿದ್ದರು.
ಇದನ್ನೂ ಓದಿ : ನಿನ್ನ ಮಗನನ್ನು ಮದುವೆ ದಿನವೇ ಕೊ*ಲ್ತೀವಿ – ಭೂಗತ ಪಾತಕಿ ಹೆಸರಿನಲ್ಲಿ ಉದ್ಯಮಿಗೆ ಬೆದರಿಕೆ!
ಈ ಮಹಿಳೆಯರ ವೀಸಾ ಅವಧಿ ಮುಗಿದಿದ್ದರೂ ಅವರು ತಮ್ಮ ದೇಶಕ್ಕೆ ಮರಳದೆ ಅಕ್ರಮವಾಗಿ ಇಲ್ಲೇ ಉಳಿದುಕೊಂಡಿದ್ದರು. ಅಷ್ಟೇ ಅಲ್ಲದೆ, ಮಾದಕ ದ್ರವ್ಯಗಳ ಮಾರಾಟ ಮತ್ತು ಗಾಂಜಾ ಸೇವನೆಯಂತಹ ಗಂಭೀರ ಅಪರಾಧ ಪ್ರಕರಣಗಳಲ್ಲಿ ಇವರು ಭಾಗಿಯಾಗಿದ್ದರು ಎಂದು ತಿಳಿದುಬಂದಿದೆ. ವಿದೇಶಿ ಪ್ರಾದೇಶಿಕ ನೋಂದಣಿ ಕಚೇರಿಯ (FRRO) ಅಧಿಕಾರಿಗಳು ಇವರನ್ನು ವಶಕ್ಕೆ ಪಡೆದಿದ್ದರು. ಆದರೆ ಅಧಿಕೃತ ಬಂಧನ ಕೇಂದ್ರಗಳಲ್ಲಿ ಜಾಗದ ಕೊರತೆಯಿದ್ದ ಕಾರಣ, ತಾತ್ಕಾಲಿಕವಾಗಿ ಇವರನ್ನು ಈ ಆಶ್ರಮದಲ್ಲಿ ಇರಿಸಲಾಗಿತ್ತು.
ಈ ಮಹಿಳೆಯರು ಆಶ್ರಮದ ಒಳಗಿದ್ದಾಗಲೂ ಅವರ ಬಳಿ ಮಾದಕ ವಸ್ತುಗಳು ಪತ್ತೆಯಾಗಿದ್ದವು ಎನ್ನಲಾಗಿದೆ. ಸದ್ಯಕ್ಕೆ ಇವರು ಪೊಲೀಸರ ಬಂಧನದಿಂದ ತಪ್ಪಿಸಿಕೊಂಡಿರುವುದರಿಂದ, ನಗರದಲ್ಲಿ ಮತ್ತೆ ಅಕ್ರಮ ಜಾಲಗಳು ಅಥವಾ ಮಾದಕ ದ್ರವ್ಯದ ದಂಧೆಗಳು ಸಕ್ರಿಯಗೊಳ್ಳುವ ಭೀತಿ ಎದುರಾಗಿದೆ. ತಲೆಮರೆಸಿಕೊಂಡಿರುವ ಈ ನಾಲ್ವರಿಗಾಗಿ ಪೊಲೀಸರು ಈಗ ತೀವ್ರ ಹುಡುಕಾಟ ನಡೆಸುತ್ತಿದ್ದಾರೆ.