ನೀವು ಮಿಶ್ರ ತರಕಾರಿಯ ಪಲಾವ್ ವಾರಕ್ಕೊಮ್ಮೆಯಾದರೂ ಉಪಹಾರಕ್ಕೆ ಮಾಡಿರುತ್ತೀರ. ಆದರೆ ಡಿಫರೆಂಟ್ ಆದ ತರಕಾರಿ ಇಲ್ಲವೇ ಪದಾರ್ಥಗಳ ಪಲಾವ್ ತಯಾರಿಸುವುದು ತುಂಬಾ ವಿರಳ ಎಂದರೆ ನೀವೊಮ್ಮೆ ಮಟರ್ ಪನೀರ್ ಪಲಾವ್ ಟ್ರೈ (Matar Paneer Pulao) ಮಾಡಲೇ ಬೇಕು. ಇದು ಉಪಹಾರಕ್ಕೆ (Breakfast Recipe) ಮಾತ್ರವಲ್ಲದೇ ಲಂಚ್ಗೂ ಬೆಸ್ಟ್ ರೆಸಿಪಿಯಾಗಿದೆ. ಸಾಮಾನ್ಯ ತರಕಾರಿಗಳಿಗಿಂತ ಇದು ವಿಭಿನ್ನ ರುಚಿಯನ್ನು ನೀಡುವುದರಿಂದ ಇದನ್ನು ಸವಿಯಲು ಖಂಡಿತವಾಗಿಯೂ ಬೋರ್ ಎನಿಸಲ್ಲ. ಹಾಗಿದ್ದರೆ ಮಟರ್ ಪನೀರ್ ಪಲಾವ್ ತಯಾರಿಸುವುದು ಹೇಗೆಂದು ನಾವಿಂದು ನೋಡೋಣ.
ಬೇಕಾಗುವ ಪದಾರ್ಥಗಳು:
* 2 ಟೇಬಲ್ಸ್ಪೂನ್ ತುಪ್ಪ
* 200 ಗ್ರಾಂ ಪನೀರ್ ಕ್ಯೂಬ್ಸ್
* 3 ಟೇಬಲ್ಸ್ಪೂನ್ ಗೋಡಂಬಿ
* 2 ಟೇಬಲ್ಸ್ಪೂನ್ ಎಣ್ಣೆ
* 1 ಟೀಸ್ಪೂನ್ ಜೀರಿಗೆ
* 1 ಇಂಚು ದಾಲ್ಚಿನ್ನಿ
* 1 ಬೇ ಎಲೆ
* 1 ಕಪ್ಪು ಏಲಕ್ಕಿ
* ½ ಟೀಸ್ಪೂನ್ ಲವಂಗ
* 4 ಪಾಡ್ಸ್ ಏಲಕ್ಕಿ
* 1 ಹೆಚ್ಚಿದ ಈರುಳ್ಳಿ
* 2 ಸೀಳಿದ ಮೆಣಸಿನಕಾಯಿ
* 1 ಟೀಸ್ಪೂನ್ ಶುಂಠಿ ಬೆಳ್ಳುಳ್ಳಿ ಪೇಸ್ಟ್
* 1½ ಕಪ್ ನೆನೆಸಿದ ಬಾಸ್ಮತಿ ಅಕ್ಕಿ
* 1 ಕಪ್ ಬಟಾಣಿ
* ½ ಟೀಸ್ಪೂನ್ ಮೆಣಸಿನ ಪುಡಿ
* ½ ಟೀಸ್ಪೂನ್ ಗರಂ ಮಸಾಲ
* 1 ಟೀಸ್ಪೂನ್ ಉಪ್ಪು
* 3 ಕಪ್ ನೀರು
* ½ ನಿಂಬೆಹಣ್ಣು
* 2 ಟೇಬಲ್ಸ್ಪೂನ್ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು
ಮಾಡುವ ವಿಧಾನ:
* ಮೊದಲಿಗೆ ದೊಡ್ಡ ಕಡಾಯಿಯಲ್ಲಿ 2 ಟೇಬಲ್ಸ್ಪೂನ್ ತುಪ್ಪವನ್ನು ಬಿಸಿ ಮಾಡಿ, ಪನೀರ್ ಮತ್ತು ಗೋಡಂಬಿ ಸೇರಿಸಿ ಕಡಿಮೆ ಉರಿಯಲ್ಲಿ ಹುರಿಯಿರಿ.
* ಪನೀರ್ ಮತ್ತು ಗೋಡಂಬಿ ಗೋಲ್ಡನ್ ಬಣ್ಣಕ್ಕೆ ತಿರುಗುವವರೆಗೆ ಹುರಿದು ಪಕ್ಕಕ್ಕೆ ಇರಿಸಿ.
* ಅದೇ ಕಡಾಯಿಯಲಿ 2 ಟೇಬಲ್ಸ್ಪೂನ್ ಎಣ್ಣೆ ಸೇರಿಸಿ, ಜೀರಿಗೆ, ದಾಲ್ಚಿನ್ನಿ, ಬೇ ಎಲೆ, ಕಪ್ಪು ಏಲಕ್ಕಿ, ಲವಂಗ, ಮತ್ತು ಏಲಕ್ಕಿ ಸೇರಿಸಿ, ಮಸಾಲೆಗಳು ಪರಿಮಳ ಬರುವವರೆಗೆ ಹುರಿಯಿರಿ.
* ಈಗ ಈರುಳ್ಳಿ, ಮೆಣಸಿನಕಾಯಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ, ಮತ್ತು ಈರುಳ್ಳಿ ಸ್ವಲ್ಪ ಬಣ್ಣ ಬದಲಾಗುವವರೆಗೆ ಹುರಿಯಿರಿ.
* ನಂತರ ಬಾಸ್ಮತಿ ಅಕ್ಕಿಯನ್ನು ಸೇರಿಸಿ, ಅಕ್ಕಿ ಕಾಳುಗಳು ಮುರಿಯದಂತೆ ನಿಧಾನವಾಗಿ ಹುರಿಯಿರಿ.
* ಈಗ ಬಟಾಣಿ, ಮೆಣಸಿನ ಪುಡಿ, ಗರಂ ಮಸಾಲಾ ಮತ್ತು ಉಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.
* ಬಳಿಕ 3 ಕಪ್ ನೀರು ಮತ್ತು ನಿಂಬೆ ರಸ ಸೇರಿಸಿ ಚೆನ್ನಾಗಿ ಬೆರೆಸಿ.
* ಪಾತ್ರೆಗೆ ಮುಚ್ಚಳ ಹಾಕಿ 10 ನಿಮಿಷಗಳ ಕಾಲ ಬೇಯಿಸಿ.
* 10 ನಿಮಿಷಗಳ ನಂತರ, ಕೊತ್ತಂಬರಿ ಸೊಪ್ಪು, ಹುರಿದ ಗೋಡಂಬಿ ಹಾಗೂ ಪನೀರ್ ಸೇರಿಸಿ ನಿಧಾನವಾಗಿ ಮಿಶ್ರಣ ಮಾಡಿ.
* ಇನ್ನೊಂದು 10 ನಿಮಿಷಗಳ ಕಾಲ ಮುಚ್ಚಳ ಹಾಕಿ ಬೇಯಿಸಿ.
* ಇದೀಗ ಮಟರ್ ಪನೀರ್ ಪಲಾವ್ ತಯಾರಾಗಿದ್ದು, ರಾಯಿತಾ ಜೊತೆ ಸವಿಯಿರಿ.
ಇದನ್ನೂ ಓದಿ : ಬ್ರೆಡ್ ಇಲ್ಲದೇ ಮಾಡಿ ಹೆಸರು ಬೇಳೆಯ ಪನೀರ್ ಸ್ಯಾಂಡ್ವಿಚ್