ಬೆಳಗ್ಗಿನ ಉಪಹಾರ (Breakfast Recipe) ಯಾವಾಗಲೂ ವಿಭಿನ್ನವಾಗಿದ್ದರೆ ಮನೆ ಮಂದಿಯೂ ಇಷ್ಟಪಟ್ಟು ಸವಿಯುತ್ತಾರೆ. ಹೆಚ್ಚಾಗಿ ಮನೆಯಲ್ಲಿ ಇಡ್ಲಿ ದೋಸೆ ತಯಾರಿಸುತ್ತಾರೆ. ಅದರೊಂದಿಗೆ ವಡೆ ತಯಾರಿಸಿದರೆ ಉಪಹಾರದ ಮಜವೇ ಬೇರೆ. ಯಾವಾಗಲೂ ಸಾಮಾನ್ಯ ವಡೆ ತಯಾರಿಸುವ ಬದಲು ಒಮ್ಮೆ ಈ ಅಲಸಂಡೆ ಕಾಳಿನ ವಡೆ (Black Eyed Peas Vada) ಟ್ರೈ ಮಾಡಿ. ಈ ಹೊಸ ರುಚಿ ಎಲ್ಲರಿಗೂ ಇಷ್ಟವಾಗುವುದಂತೂ ಖಂಡಿತಾ. ಬೆಂಗ್ಗಿನ ಉಪಹಾರವೇ ಏಕೆ, ಸಂಜೆಯ ಸ್ನ್ಯಾಕ್ಸ್ಗೂ ಇದು ಬೆಸ್ಟ್.
ಬೇಕಾಗುವ ಪದಾರ್ಥಗಳು:
* ಅಲಸಂಡೆ ಕಾಳು – 1 ಕಪ್ (ರಾತ್ರಿ ಪೂರ್ತಿ ನೆನೆಸಿದ್ದು)
* ಸಣ್ಣಗೆ ಹೆಚ್ಚಿದ ಶುಂಠಿ – 1 ಇಂಚು
* ಸಣ್ಣಗೆ ಹೆಚ್ಚಿದ ಹಸಿಮೆಣಸಿನಕಾಯಿ – 2
* ಸಣ್ಣಗೆ ಹೆಚ್ಚಿದ ಕರಿಬೇವು – ಸ್ವಲ್ಪ
* ಸಣ್ಣ ಹೆಚ್ಚಿದ ಈರುಳ್ಳಿ – 1
* ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು – 2 ಚಮಚ
* ಜೀರಿಗೆ – 1 ಚಮಚ
* ಉಪ್ಪು – ರುಚಿಗೆ ತಕ್ಕಷ್ಟು
* ಎಣ್ಣೆ – ಕರಿಯಲು ಬೇಕಾಗುವಷ್ಟು
ಮಾಡುವ ವಿಧಾನ:
* ಮೊದಲಿಗೆ 1 ಕಪ್ ಅಲಸಂಡೆ ಕಾಳನ್ನು ರಾತ್ರಿ ಪೂರ್ತಿ ನೀರಿನಲ್ಲಿ ನೆನೆಸಿಡಿ. ನಂತರ ನೀರನ್ನು ಸಂಪೂರ್ಣವಾಗಿ ಸೋಸಿಕೊಳ್ಳಿ.
* ನೆನೆಸಿದ ಅಲಸಂಡೆ ಕಾಳಿನ ಜೊತೆಗೆ ಶುಂಠಿ, ಹಸಿಮೆಣಸಿನಕಾಯಿ ಮತ್ತು ಕರಿಬೇವನ್ನು ಸೇರಿಸಿ ಮಿಕ್ಸಿಯಲ್ಲಿ ತರಿತರಿಯಾಗಿ ರುಬ್ಬಿಕೊಳ್ಳಿ. ರುಬ್ಬುವಾಗ ನೀರನ್ನು ಬಳಸಬೇಡಿ.
* ರುಬ್ಬಿದ ಮಿಶ್ರಣವನ್ನು ಒಂದು ಪಾತ್ರೆಗೆ ಹಾಕಿಕೊಂಡು, ಅದಕ್ಕೆ ಸಣ್ಣದಾಗಿ ಹೆಚ್ಚಿದ ಈರುಳ್ಳಿ, ಕೊತ್ತಂಬರಿ ಸೊಪ್ಪು, ಜೀರಿಗೆ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಕೈಯಿಂದ ಕಲಸಿಕೊಳ್ಳಿ.
* ಒಲೆಯ ಮೇಲೆ ಬಾಣಲೆಯಲ್ಲಿ ಕರಿಯಲು ಬೇಕಾದಷ್ಟು ಎಣ್ಣೆಯನ್ನು ಹಾಕಿ ಬಿಸಿ ಮಾಡಲು ಇಡಿ.
* ಕೈಗೆ ಸ್ವಲ್ಪ ನೀರು ಸವರಿಕೊಂಡು, ಸಿದ್ಧಪಡಿಸಿದ ಮಿಶ್ರಣದಿಂದ ಸಣ್ಣ ಸಣ್ಣ ಉಂಡೆಗಳನ್ನು ತೆಗೆದುಕೊಂಡು, ಅಂಗೈಯಲ್ಲಿ ಇಟ್ಟು ವಡೆಯ ಆಕಾರದಲ್ಲಿ ತಟ್ಟಿಕೊಳ್ಳಿ.
* ಎಣ್ಣೆ ಚೆನ್ನಾಗಿ ಕಾದ ನಂತರ, ತಟ್ಟಿದ ವಡೆಗಳನ್ನು ಒಂದೊಂದಾಗಿ ಜಾಗರೂಕತೆಯಿಂದ ಎಣ್ಣೆಗೆ ಬಿಡಿ. ಉರಿಯನ್ನು ಮಧ್ಯಮ ಮಟ್ಟದಲ್ಲಿಟ್ಟುಕೊಂಡು, ವಡೆಗಳು ಎರಡು ಕಡೆ ಚಿನ್ನದ ಬಣ್ಣಕ್ಕೆ ತಿರುಗಿ ಕುರುಕುರಾಗುವವರೆಗೆ ಬೇಯಿಸಿ.
* ಬೆಂದ ವಡೆಗಳನ್ನು ಎಣ್ಣೆಯಿಂದ ತೆಗೆದು ಟಿಶ್ಯೂ ಪೇಪರ್ ಮೇಲೆ ಹಾಕಿ ಹೆಚ್ಚುವರಿ ಎಣ್ಣೆಯನ್ನು ಸೋಸಿಕೊಳ್ಳಿ.
* ಈಗ ಬಿಸಿ ಬಿಸಿಯಾದ, ಗರಿಗರಿಯಾದ ಅಲಸಂದೆ ವಡೆ ಸವಿಯಲು ಸಿದ್ಧ. ಇದನ್ನು ತೆಂಗಿನಕಾಯಿ ಚಟ್ನಿ ಅಥವಾ ಸಾಂಬಾರ್ ಜೊತೆ ಸವಿದರೆ ಇದರ ರುಚಿ ಅದ್ಭುತವಾಗಿರುತ್ತದೆ.
ಇದನ್ನೂ ಓದಿ : ಬೋರಿಂಗ್ ಉಪ್ಪಿಟ್ಟು ಬಿಡಿ- ಟ್ರೈ ಮಾಡಿ ಟೇಸ್ಟಿ ರವಾ ವೆಜ್ಟೇಬಲ್ ಬಾತ್